Reakta dov gïelem nuhtjedh

Sveerjen nasjonaale unnebelåhkoeh leah judarh, romerh, saemieh, sveerjesåevmieladtjh jïh torneladtjh. Dah nasjonaale unnebelåhkoegïelh leah jiddisch, romani chib, saemiengïelh, såevmiegïele jïh meänkieli.

Gaajhkh nasjonaale unnebelåhkoegïelh edtja vaarjelidh jïh gorredidh

Laake jeahta ahte dah nasjonaale unnebelåhkoegïelide edtja vaarjelidh jïh evtiedidh. Dïhte gie lïhtseginie nasjonaale unnebelåhkosne edtja reaktam utnedh dan unnebelåhkoegïelem lïeredh, evtiedidh jïh nuhtjedh. Åejvieladtjh edtjieh dejtie nasjonaale unnebelåhkojde goltelidh jïh dej daerpiesvoetide krööhkestidh.

Sjïere nænnoes reaktah såevmiegïelese, meänkielise jïh saemiengïelide

Sjïere nænnoes reaktah dïhte åtna gie såevmiegïelem, meänkielim jallh saemiengïelem soptseste jïh tjïeltesne orre mij lea reeremedajvesne. Daesnie minoritet.se maahtah vuejnedh jis dov tjïelte lea reeremedajvesne.

Datne gie tjïeltesne årroeh reeremedajvesne reaktam åtnah åejvieladtjigujmie gaskesadtedh dov gïelesne. Datne edtjh maehtedh åadtjodh vaestiedassem dovne tjaaleldh jïh njaalmeldh seamma gïelesne.

Datne maahtah krïevedh åadtjodh aarhskuvlem, sjïere jeatja pedagogihken darjomem jïh voeresehoksem abpe jallh biehkine såevmiegielesne, meänkielisne jallh saemiengïelesne.

Jis datne årroeh naan tjïelteste Árjjepluovve, Jiellevárre, Haparanda, Jåhkkemåhkke, Giron, Bájil jallh Övertorneå datne reaktam åtna unnebelåhkoegïelem nuhtjedh gaskesadtemisnie dåapmoestovline.

Seamma saaht gusnie årroeh edtjh datne eejnegen maehtedh tjaeledh såevmiegïelesne, meänkielisne jïh saemiengïelesne Rïjhkebiejjien saadthalmetjidie jïh Diskrimineringsombudsmannen gåajkoe.
Seammalaakan aaj sjædta Justitiekansleren, Försäkringskassan, Skatteverken jïh Arbetsförmedlingen gåajkoe ierine gusnie datne paarte jallh sæjjasadtje paarten sijjesne.