Hortan te brukfara diro racklepha

Aschar tiro attjer konn attjer dova nationelli minoriteti kammar diro hortan te brukfara diro racklepha aqn kontakti ninna beddoskemanisch. Akaj fyssa diro jana saro rackelpha hortepha diro kammar ta saro doschtalo pha diro nacht penna pre diro kommuni ta pre vaver beddoskemanisch.

Dova 1 januraio 2010 avade jeck nevo horta baschi nationelli minoriteti ta minirotetiske-racklepha. Savo nationelli minoriteti jinnas byskroar, Samer, Lollothemmare ta tornedalingar. Dova nationelli minoritetiskeracklepha ashcar Jiddisch, romani (romani chib/ romaniracklepha), samiska, finska ta meänkieli.

Sass nationelli minoritetiske-racklepha sass kerras gla

Hortan pennar te dova nationelli minoriteteskeracklepha saste kerras gla . Dovan savo aschar jeck nationelli minoriteti saste kammar hortan te jana baschi siro racklepha, kerra buttare ta brukfara siro minoriteteskeracklepha. Beddoskemanischen saste schunna pre dova nationelli minoriteteri ta scunna pre dovas golepha.

Buttast soralo hortepha gla finska, meänkieli ta samiska

Buttast soralo hortepha kammar dovan savo racklar finska, meänkeli ir samiska ta boddrar an jeck kommuni an jick kerrandethemm (jick administrativo themm, savo regeringen kammar andrekerrande preal siro beddoskemanisch)

Diro savo boddrar an jeck kommuni an jick kerrandethemm kammar hortan te kommuniceri ninna beddoskemanisch pre diro racklepha. Diro saste nachta fussa svardara an rackel ta rander pre savrige racklepha.

Diro nacht penna gla te fussa nucko- ta puranohilprepha helko ir bekkanskepha pre finska, meänkeli ir samiska.

Boddrar diro an nonn attjer kommuni Kiruna, Gällivare, Arjeplog, Jokkmokk, Haparanda, Pajala ir Övertomeå kammar diro horta te brukfara minoriteteskeracklephat an kontakti ninna hortephakeret. 

Diro savo boddrar an jeck kommuni savo tji aschar an jick kerrandethemm saste nachta kontakta beddoskemanisch ta fussa puranohilprepha pre finska, meänkieli ir samiska, baschi dolle aschar mengmanisch savo nacht rackla dolle racklephat.

Beddoskemanischen saste jura to dolle aschar racklephajanade mengmanisch karni dolle aschar vekto.

Tji dynkrat sar diro boddrar saste diro sarstil nachta randra pre finska, meänkeli ir samiska, to riksdagens beddoskemanisch, Justitkanslerna, försäkringskassan, skatteverket ta diskrimineringsombudsmannen.

Akaj nacht diro fussa hilprepha

Baschi diro dynkrar te diro kommuni ir vaver beddoskemanisch tji jibbar uppri to hortan nacht diro kontaki Länsstyrelsen an Stockholms themm ir Sametinget savo saste jura to te hortan kerras. Sametinget doschtaloar gla samiska ta Länsstyrelsen an Stockholm doschtaloar gla dova vaver racklepha.

Enheti gla minoritetetiske – friggor nerrider Länstyrelsen an Stockholms themm
010-223 10 00

Sametinget
0980-780 30

Kerrandethemm gla finska, meänkieli ta samiska

Akaj nacht diro jura saro kommuni savo aschar an dova ovaro kerrandethemmen. Vevet kommuni nacht penna gla bliddra jick kerrandethemm.

Kerrandethemmen gla Finska

Borås, Botkyrka, Eskilstuna, Gällivare, Göteborg, Hallstahammar, Haparanda, Haninge, Hofors, Huddinge, Håbo, Kalix, Kiruna, Köping, Pajala, Sigtuna, Skinnskatteberg, Solna, Stockholm, Sundbyberg, Surahammar, Södertälje, Tierp, Upplands Väsby, Västerås, Umeå, Upplands-Bro, Uppsala, Älvkarleby, Österåker, Östhammar och Övertorneå.

Kerrandethemmen gla samiska

Arjeplog, Arvidsjaur, Berg, Gällivare, Härjedalen, Jokkmokk, Kiruna, Krokom, Lycksele, Malå, Sorsele, Storuman, Strömsund, Umeå, Vilhelmina, Åre, Älvdalen och Östersund.

Kerrandethemmen gla meänkieli

Gällivare, Haparanda, Kalix, Kiruna, Pajala och Övertorneå.